Wednesday, 5 October 2011

Laboutik an Tol ... Sin Pol

Pou Max, ki finn dimann nou kopi sa sante ki figir lor nou 1ye albem - Enn Lot Sezon(1992)

e enn lanrezistreman live lor Rekreasyon - 31 ti Parfin nou memwar ( 2009)

Laboutik an tol ( sante Patrimwann - enn sante pou larout - rakont enn vwayaz)

Mama travay Beletwal

Papa travay Samarel

Pa ti ena larzan ramase

Nou mars sime rel

Pou al Sebel

Kalson gouni palto trwa kar

Demi kastor lor mo latet

Kalson gouni palto trwa kar

Demi kastor lor mo latet

Ref. Laboutik an Tol Sin Pol

Laboutik anpier Sin Pier

Laboutik Konkret Laveret

Ler mazine gagn malad latet

Mama sarye mo ti frer

Papa sarye mo ti ser

Mwa, mo trenn mo p’ti lipie

Trin pase la nou fer salam


Diri disik disel savon

Pwason sale sa nou rasion

Delwil dile si kas reste

Enn kar petrol lalanp bobes.

Ref.


Mama mo soulie mord lipie

Papa mo fin vant kriye

Tifrer finn plin dan godi

La nou’arete pou nou manze

Katkat maniok dipin diper

Pima konfi bril mo labous

Larm dan lizye

Rod mo goble

Dilo disik mo’ape dans toupi.

Ref.

Saturday, 10 September 2011

Enn Ti Marmit fer so premye pa dan Liniversite





Ti ena enn ti Marmit,
Enn ti Kelly ti dans ladan
Li apiy ar so ABAIM
Alala, li rant liniverstite
Kelly, Kelly, Kelly pe vinn pli gran
Kelly, Kelly, Kelly pe viv enn gran sanzman,



Depi 2-3 zour nou ti Kelly finn fer so lantre dan Liniversite Montpellier dan Lafrans, apre so bann liniversite ki li finn frekante dan Moris,- so fami, so kolez Ville Soeurs, ABAIM, Lpt, later mama Moris, bann vwazin, ler ki respire isi, zanimo dan laferm James ...eks

Leker gro, nou finn viv so depar kouma enn fami ki pe get so zanfan grandi, bat so prop lezel


Nou pou mank li. So sourir, so lantouzias, so limour intelizan, so gran kapasite amenn ban proze , tou tou tou seki fer ki li seki li ete, mem so gran seve ...
me nou telman kontan ki li pou aprann kitsoz ki pou fer li telman plezir ... ki pou ed li grandi...

Lor sa foto la, Kelly byin atansyone, pe partisip dan enn de-brifing avek bann mam legzekitif ABAIM.

Kelly, nou fyer to parkour. Parey kouma nou fyer tou bann zenn ti aBAIM ki finn gran, an douser, me pe asim bann responsabilite inkrwayab.

To finn toultan latet ot kouma to dir
Nou swet twa tou seki bon pou sa 3 banane dan LaFrans. Nou espere to kontinye fer zis seki bon - mem kan karay pou sofe laba, mem kan pou ena dekourazman, mem kan lavi pou inpe tris.


Manz ar li e rande-vou an 2013, si pa avan !

Nou kontan twa 444 !

Wednesday, 31 August 2011

PARE? PRE? DEGIZE...

Fet degizman tou kouler, tou kiltir, kat kwin lemond nou met an valer.
Preparasion top, dekorasion pwazon. Depi lavey enn ti group zenn pe prepare mem… A gos a drwat bann ti zom la fer tapaz ek met lame dan lapat. Lao anba bann mamzel la kase ranze, pou ki sant Abaim touye! Koudey sok, balon miltikolor, girland arzante, konfeti ek ankor plis kitsoz ki met ou dan enn lavayb extra. Sa party la finn organize pou met fin a vakans skoler deziem trimes bann zanfan Saturday Care. Kouma de trwa banane avan Abaim pe kontign swiv so koutim organiz bann ti sware degizman pou bann zanfan. Tou sa dan enn bi pou ki zot termin zot vakans lor enn bon not. DO RE MI FA SOL LA SI… hihi

Bann zenn komans fer zot lantre, tiouuuuuuu an plin liver saler monte, bann Bann zenn komans fer zot lantre, tiouuuuuuu an plin liver saler monte, bann degizman la topo net, peser, saser, zeb, cow boy, vanpir, prinses jasmine, inka, saz, vie gramer, kwizinie, monper, ti baba ek lezot ki extra zoli….

Fodre ti lor baz Abaim sa ler pou konpran sa lanbians la. Ep defile large, zakana zakana bebe a nou al zwe lamarel. me boul kaskot fer so lantre lerla ti mike aranz laronnn pou ki bann sapsiway rant dan lebin.
Eeeee bann ti manze la… Ti drese net ein.. ankor sa bann ti boulet la sa bann ti kroket la,
fer dilo vinn dan labous… seki rat sa perdi net

Waoh!!! Faraon ek taitienn pe fer konesans.Zi la bon?




Hmmmm Marou fini gayn so digizma pou lane prosenn...inpe kleopat non??

Saturday, 12 March 2011

Bonn fet Moris ! Istorik ! RBZV ti lor tou Radyo @ 11.55

Rouz Ble Zonn Ver.. Pavyon nou pei 4 Kouler . Lao Lao mo pou lev twa... Mo pe nomm sa lor mo loner.

Nou'nn viv enn moman rar,inoubliab, pri boner zordi - 11er55 pil !Tou Radio Moris... Tou senn radio finn zwe ROUZ BLE ZONN VER . MBC, Radio , Radio Plus, Top FM finn aroz Moris antye... e partou lor boul later.

Nou dir zot enn gran Mersi pou sa !

Friday, 11 March 2011

Rouz Ble Zonn Ver - Le Clip

Klip realize par la MBC - Sanjay Ghoorah - vizib lor :
http://www.youtube.com/watch?v=DXWaQE_GY_o






Pou Apresye... Pou Partaze....

Thursday, 10 March 2011

Preparasyon pou Klip Rouz Ble Zonn Ver

Nou less zot zet enn koudey lor latelye preparasyon bann kostim pou tournaz klip, tanto....








Zoli non ?