Zordi le 28 Oktob, finn ena lansman
ofisiel bann laktivite pou selebre 30 an nesans abaim. Sa ti enn bien
zoli lokazion rankont ant bann manb, sinpatizan, paran e zanfan
latelie lamizik nou lorganizasion. Plizir zenerasion mamb abaim finn
zwenn pou partaz bann moman for dan listwar sa gran konba ki ti finn
koumanse an 1982 e ki pe kontinie avek ankor plis viger zordi.
Li ti enn zoli koinsidans ki sa
rasanbleman la finn arive dan zourne mondial langaz kreol. Sa
lokazion la finn permet abaim redir so krwayans dan lalit pou foul
rekonesans langaz kreol apre ki gouvernman finn aksepte ki li rantre
kouma lang opsionel dan primer. Nou finn aprann ousi ki ansam avek
Ledikasion pou Travayer, Federation of Preschool Playgroups e
Fondation pour l'Enfance Terre de Paix, abaim finn sign enn petision
pou dimann gouvernman fer kreol servi kouma mediom pou montre zanfan
lir dan lekol.
Dan koumansman, Aurelie finn explike ki
ena diferan laktivite ki pe prevwar dan kad sa selebrasion zordi la.
Par exanp, gran renovasion nou sant, instalasion enn nouvo fasilite
lakouzinn, devwalman enn nouvo logo e lansman enn nouvo websayt.
Bann invite prezan finn ousi gagn
lokazion get enn slayd show ki retras bann fe markan dan lavi
lasosiasion. Apre sa, finn ena prezantasion nouvo logo par Marousia.
Li finn donn boukou detay lor swa sa dizagn lor bann baz filozofik e
sa finn bien emosionn tou dimounn.
Bann mamb finn emerveye avek kalite sit
web. Li finn lokazion pou ankor enn fwa soulign linportans devlop enn
miltilingwism efikas atraver itilizasion lang maternel. Akoz sa ki
sit la an version kreol, angle e franse. Lezot karakteristik sit la
konsern akse a tou linformasion lor abaim e lor so bann travay e
materyel ki li finn prodir, fasilite akse a lamizik an odio e video e
posibilite gran interaksion avek boukou dimounn atraver bann lien ek
facebook, youtube, twitter, rss, myspace...Kapav aksed sit lor ladres ;
www.abaim.mu
Kouma dan tou fer abaim, ti en enn zoli
konpozant lamizik layv avek bann morso depi bann albem lontan kouma
depi albem ki pou sorti biento. Telma zoli, fet pa ti le fini.
