Friday, 9 December 2011

KOFRE CD-DVD FINN PARE POU LARGE !!!

Sa ki apel ti enn semenn mouvmante dan ABAIM sa ! Depi Lindi, Tiery depi lazans ToolBox, Chantal ek Linda depi Sant ABAIM, pe galoupe pou ki nou Kofre pare.. ti mama al sers livrezon kot IPC - linprimri, apre al kot MASA pou met ologram, debous Port Louis pou lasansir, remont dan ABAIM pou dedikass, retourn Port Louis pou lanbalaz danlamanyer. Foufff.. sa trio la finn perdi inpe pwa avek tou sa legzerzis la!

Lindi 6er30 tanto..nou pe atann. Anfin, Tiery amenn nou zafer so-so.
Zoli sourir satisfaksyon depi Chantal ki ti pe atann sa depi gramatin.
Seans dedikass kapav koumanse. Allenson, Anais e Priyanka(alias Baba)pran travay la oserye alor ki Jefferson(kasyet an parti) pe badine avek bann dekoup depi poset.
Lor sann latab la, Avathéa ki responsab lekip kontrol bann nimero alor ki Shawn, Joanna
e Shirley pe konsantre.
mmm..Dapre lord Shirley finn swazir sa rob larkansiel la, expre.
Ti Moumoune e Georgina pe met zot serye, pe apresye sa sware dedikass la net.

Normalman dan Lindi ena repet, me pesonn pa finn tro sagrin mem si pa finn fer lamizik sa swar la. Mardi ousi ti mem repetision e mem Merkredi nou ti zwenn. Sann fwa la li ti pou repete mem pou fet salam Omboudsperson. Sa ki ti enn xtra fet mo dir ou. Mo rakont zot plitar.

Monday, 5 December 2011

Wednesday, 30 November 2011

Order your COpy Now !


Album 'Enn nwel larkansiel' ti enn gran sikse lane pase . Sa lane la, nou ena gran plezir propoz bann amoure lamizik, enn version DVD sa album la. Antretan, nou finn fer klip 'rouz ble zonn ver'. Alor, tou sitwayin repiblik Moris pou ousi kontan retrouv sa kouma enn bonis lor la.

Ou pou rapel ki nou ti ena lobzektif pou mont enn repertwar nwel tipikman morisien par met dalamanier enn bann sante nwel ki zordi bann standar iniversel.

Anplis nou ti finn azout bann konpozision depi abaim mem. Seki ti plis kaptivan, labitid pa vantar, ti lantouzias nou group lamizik avek linosans bann lavwa zanfan lor bann vizaz kouler larkansiel.

Nou finn fer tousala avek bann ritm tropical nou lanvironnman kiltirel, avek bann kouler bien depi nou pei, avek lapor bann linstriman tradisionel e dan enn lanbians alafwa lazwa e rekeyman.

Sa album la dan so form CD ti pe gagn fin bann zoli zimaz nou pei. Avek led MBC, nou ti realiz enn program avek bann zoli klip. Avek koume Denis Essoo e Philippe de Magnée nou ti’ nn ousi realiz enn klip lor sante ‘alime tegn’ ki finn vinn enn gran sikse.

Avek lotorizasion MBC, nou pe met sa zoli realizasion la a dispozision piblik dan form enn DVD. Ou pou kapav gete e regete kantite fwa ou anvi: enn parti oumem ki pou defile divan ou lizie.

Dan so prezantasion, nou ena plezir ofer ou enn prodwi-kofre kot ou gagn enn cd odio, enn dvd klip e interviou e enn livre kopi sante dan lortograf kreol morisien. Ankor enn fwa, pakejing ki pou dan ou lame pou enn veritab plizir pou ou lizie e tou ou bann lezot sans. Nou bann kamarad lazans Toolbox ki’nn fer sa.

Alor, pa ezite, aste enn kofre-album pou ou, ou zanfan e lafami. Enn zoli lide kado nwel pou tou bann dimounn ou kontan ousi sa. Sirtou si zot pa Moris. Anplis, so pri zis Rs250. Album la pou disponib kot Sant Abaim, lekol Colonel Maingard, lari C. Maingard, Beau-Bassin e kot bann disker.

Mersi pou soutien ou kontinie donn nou group pou travay kiltirel ki nou pe fer.

Sunday, 27 November 2011

Bientot dans les bacs

Edition limitée - coffret de 2000 cd/dvd - incluant livret de textes, voilà ce que nous vous avons concoctés depuis quelques semaines. Un Noel typiquement Mauricien!

Wednesday, 5 October 2011

Laboutik an Tol ... Sin Pol

Pou Max, ki finn dimann nou kopi sa sante ki figir lor nou 1ye albem - Enn Lot Sezon(1992)

e enn lanrezistreman live lor Rekreasyon - 31 ti Parfin nou memwar ( 2009)

Laboutik an tol ( sante Patrimwann - enn sante pou larout - rakont enn vwayaz)

Mama travay Beletwal

Papa travay Samarel

Pa ti ena larzan ramase

Nou mars sime rel

Pou al Sebel

Kalson gouni palto trwa kar

Demi kastor lor mo latet

Kalson gouni palto trwa kar

Demi kastor lor mo latet

Ref. Laboutik an Tol Sin Pol

Laboutik anpier Sin Pier

Laboutik Konkret Laveret

Ler mazine gagn malad latet

Mama sarye mo ti frer

Papa sarye mo ti ser

Mwa, mo trenn mo p’ti lipie

Trin pase la nou fer salam


Diri disik disel savon

Pwason sale sa nou rasion

Delwil dile si kas reste

Enn kar petrol lalanp bobes.

Ref.


Mama mo soulie mord lipie

Papa mo fin vant kriye

Tifrer finn plin dan godi

La nou’arete pou nou manze

Katkat maniok dipin diper

Pima konfi bril mo labous

Larm dan lizye

Rod mo goble

Dilo disik mo’ape dans toupi.

Ref.

Saturday, 10 September 2011

Enn Ti Marmit fer so premye pa dan Liniversite





Ti ena enn ti Marmit,
Enn ti Kelly ti dans ladan
Li apiy ar so ABAIM
Alala, li rant liniverstite
Kelly, Kelly, Kelly pe vinn pli gran
Kelly, Kelly, Kelly pe viv enn gran sanzman,



Depi 2-3 zour nou ti Kelly finn fer so lantre dan Liniversite Montpellier dan Lafrans, apre so bann liniversite ki li finn frekante dan Moris,- so fami, so kolez Ville Soeurs, ABAIM, Lpt, later mama Moris, bann vwazin, ler ki respire isi, zanimo dan laferm James ...eks

Leker gro, nou finn viv so depar kouma enn fami ki pe get so zanfan grandi, bat so prop lezel


Nou pou mank li. So sourir, so lantouzias, so limour intelizan, so gran kapasite amenn ban proze , tou tou tou seki fer ki li seki li ete, mem so gran seve ...
me nou telman kontan ki li pou aprann kitsoz ki pou fer li telman plezir ... ki pou ed li grandi...

Lor sa foto la, Kelly byin atansyone, pe partisip dan enn de-brifing avek bann mam legzekitif ABAIM.

Kelly, nou fyer to parkour. Parey kouma nou fyer tou bann zenn ti aBAIM ki finn gran, an douser, me pe asim bann responsabilite inkrwayab.

To finn toultan latet ot kouma to dir
Nou swet twa tou seki bon pou sa 3 banane dan LaFrans. Nou espere to kontinye fer zis seki bon - mem kan karay pou sofe laba, mem kan pou ena dekourazman, mem kan lavi pou inpe tris.


Manz ar li e rande-vou an 2013, si pa avan !

Nou kontan twa 444 !